NJË ANALIZË LIGJORE E INSTITUTIT TË PARASHKRIMIT SIPAS SË DREJTËS NDËRKOMBËTARE PENALE DHE LEGJISLACIONIT SHQIPTAR.

Abstract

Parashkrimi i përgjegjësisë së veprës penale në të drejtën ndërkombëtare është një çështje komplekse dhe e diskutueshme që kërkon analizë të kujdesshme. Instituti i parashkrimit i referohet afatit kohor brenda të cilit një vepër penale mund të ndiqet ose dënohet. Ky është një parim i rëndësishëm i ligjit penal që shërben për të siguruar që drejtësia të vendoset brenda një afati të arsyeshëm dhe për të parandaluar abuzimin e proceseve ligjore. Zbatimi i parashkrimit të përgjegjësisë penale në kontekstin e së drejtës ndërkombëtare, vazhdon të jetë një problematikë në ditët e sotme. Kjo për shkak se krimet e rënda si gjenocidi, krimet kundër njerëzimit dhe krimet e luftës mund të mos jenë subjekt i parashkrimit për shkak të peshës së tyre dhe nevojës për të siguruar që përgjegjësit të vendosen para drejtësisë. Ky punim ofron një pasqyrë të institutit të parashkrimit në të drejtën penale ndërkombëtare, duke përfshirë qasjet e ndryshme të ndërmarra nga gjykatat ndërkombëtare. Ai shqyrton tensionet ndërmjet parimeve të drejtësisë, llogaridhënies dhe sigurisë ligjore që mbështesin debatin për parashkrimin e veprave penale. Punimi diskuton gjithashtu ndikimin e parashkrimit në aftësinë e drejtësisë penale ndërkombëtare për të vënë përpara përgjegjësisë autorët e krimeve ndërkombëtare. Rëndësia e punimit qëndron në ofrimin e njohurive mbi sfidat dhe mundësitë e paraqitura nga qasjet e ndryshme të parashkrimit në të drejtën penale ndërkombëtare, duke kontribuar kështu në zhvillimin e një qasjeje të qëndrueshme dhe parimore që mbështet vlerat e iv drejtësisë dhe llogaridhënies. Ai ofron një kontribut lidhur me përditësimin e literaturës kombëtare dhe qëndrimin e Shqipërisë ndaj parashkrimit të veprave penale në të drejtën penale ndërkombëtare.